DISKRIPSHON HISTORIKO DI FUNDASHON PA KONSUMIDÓ

Na promé lugá Fundashon Pa Konsumidó no ta un bònt òf un asosiashon di konsumidónan, pero nos ta un fundashon. Segun leinan eksistente un fundashon no por tin miembro. Nos organisashon ta konsistí solamente di algun miembro di Direktiva, algun trahadó ku ta traha pa e Direktiva i algun boluntario ku ta yuda/konsehá Direktiva. Manera e nòmber mes ta sugerí tambe, no ta trata aki di un organisashon di konsumidónan na Kòrsou, pero un organisashon pa konsumidónan na Kòrsou. Miembronan di Direktiva, trahadónan di ofisina, i voluntarionan no ta traha pa nan mes interes komo konsumidó, pero pa konsumidónan na Kòrsou en general.

Awor ta ken ta konsumidó? Konsumidó ta tur hende ku di un òf otro forma ta kumpra i paga pa artíkulonan, trabounan òf servisionan partikular pa su mes i propio uso. Pues Fundashon pa Konsumidó ta un organisashon ku ta sali na interes di un i tur. No opstante ku nos fundashon ta dispuesto na yuda tur konsumidó tantu esnan grandi komo esnan chikí, tantu esnan ku moda komo esnan ménos pudiente, desaroyo a hiba nos den un direkshon ku mayoria di nos klientenan ta e konsumidó ku ménos rekurso òf ku entradanan abou; trahadónan ku trabou òf sin trabou i nan famianan.

E movementu konsumista a originá na paisnan oksidental manera Merka, Inglatera, Hulanda etc. Fondo i miembronan dje movementu aki tabata pertenesé na e klase meimei. Pero segun ku tèmpo ta pasa mas i mas trahadó i nan famia tambe a wòrdu reklutá. Esnan ku tabata tin un sueldo òf salario pa gasta a lanta organisashonnan pa protehá nan mes kontra fabrikantenan i komersiantenan ku via nan empresa(nan) na un manera organisá ta purba atraé e plakanan di trahadó i empleadonan.

Parti 1 di 6

Sigi lesa