DISKRIPSHON HISTORIKO DI FUNDASHON PA KONSUMIDÓ

Den paisnan di terser mundu entradanan di trahadónan ku trabou òf sin trabou ta hopi mas abou ku den paisnan 'desaroyá'. Aki na Kòrsou e situashon ta bira ainda mas importante pa e tiki entrada ku bo tin bai na artíkulonan, servisionan di bon kalidat ku ta nesesario tambe pa bo desaroyo personal i di bo pais. Ta konosí ku monopolionan komersial grandi den paisnan oksidental ta trata bende nan produktonan via propaganda agresivo hopi biaha hasta engañoso, ku preisnan di benta i fasilidatnan pa paga na kuota ku ta sin eskrupulo. Pa kolmo no tabatin leinan sufisientemente kla pa protehá e konsumidó.

Generalmente mirá, por bisa ku mas o ménos for di añanan ’60 pa ’70 e movementu konsumista a kuminsá hasi su entrada aki na Kòrsou tambe. Sindikalismo na Kòrsou a hasi intentonan serio pa yega na un organisashon pa konsumidó. Den e añanan ei sindikalismo tabata kasi kompletamente metí den e lucha pa rekonosimentu di derechinan di e konsumidó. Riba su mes e plannan tabata parse imposibel pa konkretisá. Pero ku perseveransha i insistensha poko tempu despues, den un forma no strukturá i ku yudansa di un korant, amanan di kas a kuminsá kontrolá preisnan den supermerkado, ku tabata ser publiká den e korant en kuestion. E forma no strukturá i e echo ku posiblemente e korant lo a hañ’é den problema ku komersiantenan ku ta pone aviso den e korant, a trese kuné ku e intento aki tambe a muri un morto silensioso.

Na komienso di aña 1975 Gobièrnu Sentral atraves di su minister presidente sr. J.M.G. Evertsz a aserká e asuntu aki na un manera mas strukturá. Durante un reunion di informashon tambe a keda invitá e Steering Committee di Kòrsou, representa pa su presidente di e tempu ei, sra. Irma van der Biest. Den e tempu ei a surgi un diskushon di karakter fundamental rondó e preguntanan: ta ken su tarea pa sali na defensa di e konsumidó na un manera organisá? Ta tarea di Gobièrnu so? Ta tarea di Gobièrnu i medionan di komunikashon? Ta tarea di Gobièrnu i e konsumidónan? Òf ta tarea di konsumidónan ku yudansa di Gobièrnu?

Parti 2 di 6

Regresa back - Índise di historia - Sigi lesa